റോമർ 8:28

ഈ വാക്യം തെറ്റായി ഉദ്ധരിക്കപ്പെടുന്നത്രയും മറ്റു ചുരുക്കം വാക്യങ്ങളേ ഉള്ളൂ — മിക്കപ്പോഴും ശവസംസ്കാരങ്ങളിൽ, മിക്കപ്പോഴും വളരെ നേരത്തെ. അതുകൊണ്ടു ഇതു എന്താണു പറയുന്നതു എന്നു കൃത്യമായി പറയേണ്ടതുണ്ടു.

സകലവും നല്ലതാണു എന്നു ഇതു പറയുന്നില്ല. പൗലൊസിനു അതു നന്നായി അറിയാമായിരുന്നു; കപ്പൽച്ചേതങ്ങളും അടിയും ഒറ്റിക്കൊടുക്കലും അവൻ തന്നെ പട്ടികപ്പെടുത്തുന്നുണ്ടു, ഒരിക്കൽപോലും അവയെ നല്ലതു എന്നു വിളിക്കാതെ. സകലവും നന്മെക്കായി *കൂടി വ്യാപരിക്കുന്നു* എന്നാണു — ചേരുവയെക്കുറിച്ചല്ല, ചേർച്ചയെക്കുറിച്ചാണു ആ വാക്കു. മാവു അപ്പമല്ല. മുട്ട അപ്പമല്ല. അടുപ്പിലെ ചൂടും അല്ല. ഘടകങ്ങളിൽ ഒന്നിനോടും സാമ്യമില്ലാത്ത ഒന്നാണു ഉണ്ടാക്കപ്പെടുന്നതു.

ആ വ്യാപാരം നീ കാണും എന്നും ഇതു പറയുന്നില്ല. “നാം അറിയുന്നു” എന്നാണു, “നാം കാണുന്നു” എന്നല്ല. ഇവിടത്തെ അറിവു കൺമുമ്പിലുള്ള തെളിവിനു എതിരായി പിടിച്ചുനിർത്തുന്ന ഒരു ഉറപ്പാണു — കഠിനമായ ഒരു വർഷത്തിൽ പ്രയോജനപ്പെടുന്ന ഏക അറിവും അതാണു.

മൂന്നു വാക്യം കഴിഞ്ഞു പൗലൊസ് “നന്മ” എന്നതിനു നല്കുന്ന നിർവ്വചനം ശ്രദ്ധിക്കുക: ക്രിസ്തുവിന്റെ സ്വരൂപത്തോടു അനുരൂപപ്പെടുക. അതാണു ഇവിടത്തെ നന്മ. സുഖമോ, പഴയ അവസ്ഥ തിരികെ കിട്ടുന്നതോ, നീ തിരഞ്ഞെടുക്കുമായിരുന്ന ഫലമോ അല്ല. നിന്നെ രൂപപ്പെടുത്തിയ സാഹചര്യത്തെക്കാൾ ദീർഘകാലം നിലനില്ക്കുന്ന ഒന്നു നിന്നിൽ രൂപപ്പെടുന്നു.

അർത്ഥം കാണാൻ കഴിയാത്ത ഒന്നിന്റെ നടുവിലാണു നീ എങ്കിൽ, അതിനെ നല്ലതു എന്നു വിളിക്കാൻ ഈ വാക്യം ആവശ്യപ്പെടുന്നില്ല. അതു വ്യർത്ഥമല്ല എന്നു വിശ്വസിക്കാനാണു.