യോഹന്നാൻ 14:1

ഈ സ്ഥാനം ശ്രദ്ധിച്ചാൽ അതു ഏതാണ്ടു സഹിക്കാനാവാത്തതാണു. മുൻവാക്യം, കോഴി കൂകുംമുമ്പു മൂന്നു പ്രാവശ്യം തന്നെ തള്ളിപ്പറയും എന്നു യേശു പത്രൊസിനോടു പറയുന്നതാണു. നാം വായിക്കുന്ന അദ്ധ്യായവിഭജനം പിന്നീടു ചേർത്തതാണു; മൂലത്തിൽ ഇടവേളയില്ല. തന്നെക്കുറിച്ചുള്ള ഏറ്റവും മോശം കാര്യം കേട്ടുകഴിഞ്ഞ പത്രൊസ്; ആ മുറിയിലെ അടുത്ത വാക്കുകൾ ഇതാണു: നിങ്ങളുടെ ഹൃദയം കലങ്ങരുതു.

അതുകൊണ്ടു ഇതു പൊതുവായ പ്രോത്സാഹനമല്ല. മണിക്കൂറുകൾക്കകം പരസ്യമായി, കഠിനമായി പരാജയപ്പെടും എന്നു അറിഞ്ഞ ഒരു മനുഷ്യനോടു പറയുന്നതാണു.

ഇതിലൊന്നും ആ പ്രവചനത്തെ തിരുത്തുന്നില്ല. യേശു അതു മയപ്പെടുത്തുന്നില്ല; പത്രൊസ് ഒരുപക്ഷേ പിടിച്ചുനിന്നേക്കാം എന്നു സൂചിപ്പിക്കുന്നുമില്ല. തള്ളിപ്പറച്ചിൽ അവിടെത്തന്നെ നില്ക്കുന്നു. അതിനോടൊപ്പം നല്കുന്നതു വിശ്വസിക്കാനുള്ള ഒരു നിർദ്ദേശമാണു; വിശ്വാസത്തിന്റെ വിഷയം രണ്ടു തവണ പറയുന്നു: ദൈവത്തിൽ വിശ്വസിപ്പിൻ, എന്നിലും വിശ്വസിപ്പിൻ.

രണ്ടു ഭാഗവും പ്രസ്താവനയായോ കല്പനയായോ വായിക്കാം; പരിഭാഷകർ വിയോജിക്കുന്നു. ഏതായാലും ആ ചേർത്തുവെക്കലാണു ശ്രദ്ധേയം. ഏകദൈവവിശ്വാസികളായ യെഹൂദരുടെ ഒരു മുറിയിൽ, തന്റെ വധത്തിനു തലേരാത്രി, ദൈവത്തിലുള്ള വിശ്വാസത്തോടു തന്നിലുള്ള വിശ്വാസത്തെ അവൻ ഒരേ പ്രവൃത്തിയെന്നപോലെ ചേർത്തുവെക്കുന്നു.

കലക്കം അന്യായമാണെന്നു ഈ വാക്യം പറയുന്നില്ല. അവരുടെ ഹൃദയങ്ങൾക്കു കലങ്ങാൻ എല്ലാ കാരണവുമുണ്ടായിരുന്നു, ഉടനെ അവ കലങ്ങുകയും ചെയ്യും. അതു സത്യമായിരിക്കുമ്പോൾ ഭാരം എവിടെ വെക്കണമെന്നു അതു പറയുന്നു.